爱华网小卓尔的小床有四只万向脚轮，用得辰光长了，脚轮坏脱两只。到啥地方淘两只配上去？好像附近看弗大到，还是到宁波路、牛庄路去兜兜，顺便还可以白相南京路，长远呒么去了。
有一趟礼拜六，借了买轮盘的名义，同老婆两嘎头，到市中心兜了一圈。
过两天就是重阳节了，总要买点重阳糕应应景的伐。而沈大成的糕点嘎有名气，总要带点回去搿。哟！排队人哪能嘎许多？旁边叠只窗口倒呒啥人排队，凑过去一看，也有重阳糕出售的嘛！是精包装的那种，价格贵了点，好象也不是当天出笼搿。见有人也嘞买，我便也要了两盒。只要能吃，能应应景，还真弗能太讲究搿。
走到贵州路口，又看见那家咖啡馆了。几把撑开的大阳伞下，都坐满了人。还呒么靠近，香味就飘过来了。嗅到咖啡的香味，就更觉得又累又渴。我对老婆讲，侬去坐位置，我来点咖啡。跑进店堂，凑到巴台前，看牢墙朗的品名、价格，有点尴尬，字体太小，字色也太淡，好象是淡咖啡色的那种，还夹杂一些外文，既看弗清爽，也看弗懂，叠哪能点啊？平时只晓得吃，还真弗晓得咖啡的各种叫法呢。算了，还是让老婆来伐，伊比我资格老，平时也都是伊去张罗搿。
老婆听我讲要“清咖”时，便问我：要小杯还是大杯搿？我讲：小杯吃味道，大杯才解渴呢，难板吃趟咖啡，就要吃得过瘾，来大杯伐。
伊给我端来一杯美式清咖，味道还比较正，只是弗够浓，大概美式清咖是叠能搿伐？难板到外头吃趟咖啡，啥地方弄得清爽咖啡的名堂？只觉得，现磨的，更加香点，比速熔咖啡好吃得多，吃搿辰光，感觉也灵得多。至于，究竟正宗弗正宗，究竟有点啥巧门，实在弄弗清爽。弗是味觉功能太差，而是确实弗大懂咖啡。弗懂咖啡，弗影响吃咖啡。吃搿辰光，啥人看得出侬是乡下人还是老克勒？
我吃得太快了，一大杯咖啡，三口两口就拨我夯光了。叠啥地方是嘞品咖啡？简直就是牛饮嘛。侬看邻座几个外国人，吃得多少笃悠悠？比我先吃，小杯里还有半杯呢。那边一个老克勒，吃得眼睛也眯起来了。伊拉叠种吃法，大概才可以算“品”了伐？
2012，10，21，丰庄随笔
