爱华网༄༅། །སྐྱོ་གདུང་མཆི་མའི་རླབས་རིས།
ཨ་དཀོན་རིན་པོ་ཆེ་སྐུ་བཀྲོངས་པ་ཐོས་རྗེས།
ནམ་མཁའི་གོ་ལ་ཡངས་པའི་གཤོག་ལྟེབ་ཏུ།།
རྒྱུ་སྐར་བྱེ་བའི་མེ་ཏོག་བཀྲ་བའི་ཚེ།།
མི་འདོད་རླུང་ནག་བདུད་ཀྱི་ཆོ་འཕྲུལ་གྱིས།།
མཐོ་སྒང་གོ་ལའི་ཆོན་ཐག་བཅད་ཅེས་ཐོས།།
ཤར་ནུབ་རྒྱལ་ཁམས་བྱིས་པའི་ངག་སྒོ་ནས།།
དུས་ཀྱི་སྒྲོན་མེ་བདས་པའི་གཏམ་ངན་ཞིག།
མི་འདོད་རླུང་བུས་ཕྱོགས་སུ་ཁ ;ྱེར་བ་འདིས།།
ཡིད་སྐྱོའི་སེམས་ཁམས་ཉེར་དགུའི་སྨག་ཏུ་བསྒྱུར།།
ཉེར་གཅིག་དུས་ཀྱི་ཡོ་ལང་རྒོད་པའི་ཚེ།།
གདོང་དམར་བོད་པའི་སྦྲ་ནག་གྲུ་བཞི་ཡང་།།
འདི་ལྟར་བསྒྱེལ་ན་གཏན་ནས་མི་རུང་ཞེས།།
ཁྱོད་ཉིད་གང་སར་འདུར་བ་ད་དུང་དྲན།།
དྲོད་ཁོལ་སྟོང་གིས་ཕྱུག་པའི་ཉི་མའི་འོད།།
མགོ་ནག་བོད་པའི་མིག་ལ་མཛའ་ན་ཡང་།།
ཤར་ནས་ནུབ་ཏུ་བཞུད་པའི་ལས་དབང་འདིས།།
ས་མཐོའི་གྲོང་དུ་ཡང་གཅིག་མུན་པ་རུབ།།
རིགས་ཀྱི་དཔའ་བོའི་རྣམ་ཤེས་དབྱིངས་སུ་ཐིམ།།
མགོན་མེད་དྭ་ཕྲུག་མིག་ཆུ་ཁྲག་ཏུ་བཞུར།།
སྐྱོ་སྣང་ཁོག་ཏུ་སྦྲུམ་པའི་ཉིན་ཞག་འདི།།
དུས་ཀྱི་ཆད་པ་ཡིན་ནམ་ཨ་ཙ་མ།།
འཁོར་བ་རྨི་ལམ་འདྲ་བའི་ལོ་རྒྱུས་དེ།།
དུས་གསུམ་རྒྱལ་བའི་དགོངས་པས་བཀྲལ་བ་བཞིན།།
དེ་རིང་ཕྱོགས་ནས་ཐོན་པའི་གཏམ་ངན་འདིའི།།
མི་བདེན་རྫུན་རྐུབ་གཏིང་ནས་བརྡོལ་བར་ཤོག།
རིས་མེད་དབུལ་ཕོངས་ཡོངས་ཀྱི་སྐྱབས་མགོན་ཞིག།
གློ་བུར་སྐུ་སྲོག་ཁྲག་ཏུ་བསྒྲེས་ཚུལ་གྱི།།
སྐྱོ་བའི་རྣམ་ཐར་སེམས་ལ་ལྷུང་བའི་ཚེ།།
འགྲོ་བ་མི་ཡི་རིགས་ལ་སྙིང་རླུང་ལངས།།
བསྟན་དང་འགྲོ་ལ་རྣམ་པར་འཚེ་བ་ཡི།།
ནག་པོའི་རྩ་ལག་རྡུལ་དུ་རློག་ཕོད་པའི།།
དམ་ཅན་ཆོས་སྐྱོང་སྲུང་མའི་དམག་ཚོགས་རྣམས།།
དགོས་པའི་དུས་འདིར་ཤར་ནུབ་གང་དུ་ཡིབ།།
ཀྱེ་མ་དུས་ངན་སྲིན་མོའི་མཆེ་དབར་ནས།།
དམ་པའི་སྐུ་སྲོག་ཤོར་བའི་ལས་དབང་འདི།།
ཉམ་ཐག་བོད་མིའི་སྐལ་བར་སྨིན་པ་ཡང་།།
སུ་དང་གང་ལ་ཆད་པའི་བུ་ལོན་ཡིན།།
ཕན་ཤུལ་འཆི་མེད་དབང་འདུས་ཀྱིས་ཕྱི་ལོ་༢༠༡༣ལོའི་ཟླ་༡༠ཚེས་༡༤ཉིན་མྱང་སྨད་ཉི་མ་མདོ་ནས།
